Football
യുവേഫ ചാമ്പ്യന്‍സ് ലീഗില്‍ ത്രില്ലര്‍ വിജയവുമായി ബാഴ്‌സലോണ. ഗോള്‍മഴ പെയ്ത മത്സരത്തില്‍ ബെനഫിക്കയെ നാലിനെതിരെ അഞ്ച് ഗോളുകള്‍ക്കാണ് ബാഴ്‌സ തോല്‍പ്പിച്ചത്. ബെനഫിക്കയ്ക്ക് വേണ്ടി വാന്‍ഗലിസ് പാവ്‌ലിഡിസ് ഹാട്രിക് നേടി തിളങ്ങിയെങ്കിലും വിജയത്തിലെത്തിക്കാനായില്ല. ബാഴ്‌സയ്ക്ക് വേണ്ടി റോബര്‍ട്ട് ലെവന്‍ഡോവ്‌സ്‌കിയും റാഫീഞ്ഞയും ഇരട്ടഗോളുകള്‍ നേടി.
🤯 FULL TIME!!!!! 🤯#BenficaBarça | @ChampionsLeague pic.twitter.com/yRkvXMq6iq
സ്വന്തം തട്ടകത്തില്‍ നടന്ന മത്സരത്തിന്റെ തുടക്കത്തില്‍ തന്നെ ബെനഫിക്ക മുന്നിലെത്തി. രണ്ടാം മിനിറ്റില്‍ ബാഴ്‌സ ഗോളിയുടെ പിഴവ് മുതലെടുത്ത് വാന്‍ഗലിസ് പാവ്‌ലിഡിസ് ആതിഥേയരെ മുന്നിലെത്തിച്ചു. 13-ാം മിനിറ്റില്‍ ബാള്‍ഡയെ വീഴ്ത്തിയതിന് ലഭിച്ച പെനാല്‍റ്റി ലക്ഷ്യത്തിലെത്തിച്ച റോബര്‍ട്ട് ലെവന്‍ഡോവ്‌സ്‌കി ബാഴ്‌സയെ ഒപ്പമെത്തിച്ചു. 22-ാം മിനിറ്റില്‍ പാവ്‌ലിഡിസിലൂടെ ബെനഫിക്ക വീണ്ടും മുന്നിലെത്തി. 30-ാം മിനിറ്റില്‍ ലഭിച്ച പെനാല്‍റ്റി ലക്ഷ്യത്തിലെത്തിച്ച് പാവ്‌ലിഡിസ് തന്റെ ഹാട്രിക്കും ബെനഫിക്കയുടെ മൂന്നാം ഗോളും കണ്ടെത്തി.
രണ്ടാം പകുതിയില്‍ ബാഴ്‌സ തിരിച്ചടിച്ചു. 64-ാം മിനിറ്റില്‍ റാഫീഞ്ഞയാണ് ബാഴ്‌സയുടെ രണ്ടാം ഗോള്‍ കണ്ടെത്തിയത്. എന്നാല്‍ നാല് മിനിറ്റിനുള്ളില്‍ റൊണാള്‍ഡ് അറൗജോയുടെ ഓണ്‍ ഗോള്‍ ബാഴ്‌സയ്ക്ക് തിരിച്ചടിയായി. ഇതോടെ 4-2ന് പിന്നിലായ ബാഴ്‌സയുടെ ഗംഭീര തിരിച്ചുവരവാണ് പിന്നീട് കാണാനായത്.
78-ാം മിനിറ്റില്‍ ലാമിന്‍ യമാലിനെ വീഴ്ത്തിയതിന് ബാഴ്‌സയ്ക്ക് അനുകൂലമായി പെനാല്‍റ്റി ലഭിച്ചു. പെനാല്‍റ്റി എടുക്കാനെത്തിയ ലെവന്‍ഡോവ്‌സ്‌കിക്ക് പിഴച്ചില്ല, ബാഴ്‌സയുടെ മൂന്നാം ഗോളും പിറന്നു. 86-ാം മിനിറ്റില്‍ എറിക് ഗാര്‍സിയയിലൂടെ ബാഴ്‌സ ആവേശ സമനില കണ്ടെത്തി. 96-ാം മിനിറ്റില്‍ ആവേശമുയര്‍ത്തി റാഫീഞ്ഞ ബാഴ്‌സയുടെ വിജയഗോളും കണ്ടെത്തി.
Content Highlights: Raphinha caps late Barcelona comeback to settle nine-goal thriller with Benfica